في الوقت ده اتحولت شقتنا لسوق من كتر الناس اللي اتلمت من تاني، كنت منهار، بصرخ، عامل زي اللي عنده صرع، عمال أردد وأقول الشيطان خطف ابني، الشيطان خطف ابني.. خدني عم حسين اللي ساكن تحتينا وقالي: ـ يابني إحنا لازم نجيب شيخ ضروري.. بصتله وأنا بدمع ومنطقتش، قالي: ـ سيبها على الله وعليا.. تاني يوم لقيته جاي ومعاه راجل وقور عنده دقن بيضا وملامحه مريحة جدًا، قرأ الراجل وقتها على جسم يوسف ابني عشان يقدر ينطق، وفعلًا أتكلم وحكى للشيخ ده كل حاجة، بعدها أتكلم مع مراتي شوية، وبعدين طلب منهم يخرجوا ونفضل أنا وهو بس..
بصلي وقتها في عنيا بقوة، كنت بحاول أتحاشى نظراته ليا بس مكنتش قادر، أتكلم بهدوء وقالي: ـ لازم تصارحني عشان أقدر أساعدك، أنت مخبي عني إيه؟؟ بصتله وفضلت ساكت عشان يكرر كلامه من تاني، في الوقت ده كان لازم أحكي، أحكي كل حاجة عملتها ليلة ولادة مراتي من تمن سنين..
وقتها كنت عارف إن مراتي هتولد توأم، بس يوم الولادة حصلت مشكلة كبيرة ومراتي تعبت جدًا، حتى إن الدكتور خرج وقالي إن احتمال كبير يمــ,,ـــــوت طفل من الاتنين عشان ينقذوا مراتي، كنت ساخط وقتها جدًا ومش متقبل إن حد من ولادي يمــ,,ـــــوت، كنت وقتها قارئ عن سحر معين بيسبب الإجهاض على صفحة معالج روحاني..
كلمته فورًا وحكيت له كل حاجة، رد عليا وقالي عندك استعداد تعمل اللي هطلبه منك، رديت وقولتله طبعًا وحالًا، بعدها طلب مني أكتب حروف معينة بتسلسل معين، وأجيب بخور أسود ودم أي حيوان، وأخلط البخور مع الدم في الورقة، وأحاول أقف على راس مراتي وأحط الورقة في هدومها وأردد ـ أقسمت عليك بحق فلان وفلان وفلان أن تدخل إلى الرحم، وتنقذ الولد، وتحــ,,ـــــرق المرض، وتُسكن الألم..
كان مطلوب مني أردد ده سبع مرات، وقتها طلبت من الممرضة أدخل لمراتي بأي طريقة عشان أرقيها، وعرفت فعلًا أدخل، ووسط شغل الدكتور اللي بصلي بتعجب حطيت الورقة في هدومها، وحطيت إيدي على راسها ورددت الكلام بصوت واطي وكأني برقيها، في الوقت ده فعلًا الولادة اتسهلت والطفلين نزلوا ومحدش منهم مات.. بصلي الشيخ بغضب شديد وإن متكلمش خالص، بصيتله وأنا ببكي بندم وقولتله: ـ أبوس إيدك قولي أنا عملت إيه؟؟
ـ أنت وكلت قرينك يابني يبقا حارس لابنك اللي كان عنده مشكلة وهو بيتولد واللي هو سيف، بس بما إن القرين مجرد شيطان فهو نفذ المهمة وفضل وكيل على ابنك، عشان كدا ابنك كان دايمًا مع امه وبيخاف منك أنت، لأنه كان بيشوف قرينك اللي هو شبهك كتير جدًا، وفضل القرين متربص بابنك لوقت معين عشان ياخده منك، وكان أنسب وقت هو لما يكمل تمن سنين، خطف ابنك مرة ورجعه لان الجسم البشري صعب يتأقلم على عالمهم وممكن ينهار ولازم يتعود..
وخطفه تاني ورجعه، وكانت المرة التالتة هي الأخيرة، لأنه طالما أتمكن منه وأنت اللي أديته الفرصة فهو هياخده منك للأبد.. وقتها اترميت على إيد الشيخ وأنا منهار: ـ أبوس إيدك اتصرف بالله عليك.. ـ يابني أهدى وقول يارب، روح صلي ركعتين توبة الأول قبل ما أعمل أي حاجة..
وفعلًا جريت وصليت، بكيت كتير أوي في صلاتي وطلبت من ربنا يسامحني إني استعنت بالشيطان ومستسلمتش لقدره يومها، واشتغل الشيخ بعدها، الأول قرأ عليا عشان قريني اللي متحرر من يوم ولادة ابني يرجع لجسمي، وبعدها دار بينهم حوار طويل انتهى بقراءة آيات الحــ,,ـــــرق على القرين اللي استسلم في النهاية وقال إننا هنروح الأوضة هنلاقي الطفل وإنه مش هيخطفه تاني..
طبعًا أنا وقتها كنت في غيبوبة، بس لما فقت أتحكالي كل ده، وفعلًا ابني رجع، والشيخ قرأ بعدها في البيت كله وطلب مننا نعمل كذا حاجة للتحصين، وفي النهاية بصلي بصة مُخيفة، اللي هو إياك تسلك الطريق ده تاني، لإن طريق الشيطان آخرته سودة، آخرته جهنم وبئس المصير.. استخدام السحر من أقوى الطرق لتنشيط القرين فلا تجرب ولو من باب الفضول.. بقلم/ أحمد محمود شرقاوي
