يوم عيد ميلاد بنتي السادس لاحظت عليها شرود غريب وكانت تايهة وكأنها سرحانة في حاجة معينة خاصة بيها، ولما حاولت أعرف هي سرحانة في إيه قالتلي إنها مستنية صاحبتها الجديدة (فيروز) اللي لسة مجتش لحد دلوقتي، استغربت شوية لأني معرفش مين فيروز دي ولا عمرها حكتلي عنها ولكني حسيت إن بنتي متعلقة بيها أوي، بدليل إنها متجاهلة عيد الميلاد كله ومستنياها مخصوص..
ومن جوايا بقيت بتمنى إن فيروز دي تيجي في أسرع وقت عشان بنتي تكون مبسوطة وتفرح، وفضلت مراقبة الحضور لكن فيروز مجتش، ورغم كدا بنتي بقت في قمة السعادة والفرحة، ومن جوايا ظنيت إنها نسيت فيروز وسط دوشة عيد الميلاد، ولما خلصنا وجينا نراجع الهدايا قالتلي إن أحسن هدية جتلها هي هدية فيروز..
استغربت أوي وقولتلها إن كل اللي حضروا العيد ميلاد كانوا ٦ بنات وأنا عارفاهم كويس وإن فيروز دي مجتش أصلًا، ضحكت وقالتلي إنها جت وحضرت عيد الميلاد كله لحد ما طفينا الشمع، وانتهى اليوم وأنا بحاول أقنع نفسي إن موضوع فيروز ده مجرد خيال بسبب أفلام الكرتون أو الحواديت اللي بتسمعها كل شوية من خالتها.. لكن الموضوع بدأ يتطور بطريقة غريبة، بنتي بقت كل شوية تحكي وتقول: ـ فيروز قالت كذا.. ـ فيروز عاوز كذا..
ـ فيروز مبتحبش الأكل ده.. كنت بتمالك أعصابي وأحاول أتكلم مع بنتي واحتويها، لكن كان عندها إصرار إن فيروز بتيجي كتير وتقعد معاها في الأوضة، وملقتش حل غير إني أكلم أبوها في الموضوع وأحكيله.. في البداية خد الموضوع بنفس الطريقة اللي خدته بيها وإن ده بسبب الكرتون اللي بتشوفه والحواديت اللي بتسمعها، لكن مع الوقت البنت بقت بتختفي في أوضتها طول الوقت، وكانت بتظهر ألعاب في أوضتها محدش فينا اشتراها، وكانت بتقول إن دي ألعاب فيروز، لحد ما أبوها بدأ يتعصب ويتعامل معاها بعنف وياخد منها الألعاب دي بالعافية ويرميها عشان تبطل الكلام الخيالي اللي بتقوله ده..
وللأسف كان أسوأ قرار ممكن نعمله لأن البنت بدأت تعمل حاجات غريبة، أول حاجة كسـ,ـرت حنفيات الحمام وغرقت الدنيا كلها مية، ولما لحقنا الدنيا لقيناها ولعت غاز البوتجاز وسابته مفتوح طول الليل ولولا ستر ربنا والشباك المفتوح كنا اتخنقنا أو اتحرقنا.. أبوها اتعامل معاها بقـ,ـسوة أكبر لحد ما البنت بقت بتزعق، بتشتم، شوية وبقا صوتها بيتغير معانا بنبرة مختلفة تمامًا، كانت بتهدد وتقول: ـ محدش يضـ,ـرب صاحبتي.. الغريب إنها كانت بتتكلم بطريقة تثير الرعب جوة أي حد يسمعها..
حاولت أحل الموضوع بكل الطُرق لكن فشلت تمامًا، شغلنا قرآن، رشينا مية مقروء عليها، قرأت عليها الرقية، وديتها لطبيب نفسي، حتى إني خليت خالتها تتكلم معاها لأنها كانت أكتر واحدة بتحبها، لكن البنت كانت حالتها بتسوء.. بقت بتمشي وهي نايمة، تكتب على حيطان البيت كلام مش مفهوم، حتى إننا أكتر من مرة كنا بنصحى من النوم نلاقيها قاعدة جوة الدولاب بتراقبنا وأحنا نايمين، وشكلها مُرعب بطريقة لا تُوصف..
وغصب عني بقيت خايفة من كل حاجة، بقيت خايفة من بنتي، وخايفة إني أقعد معاها من الأساس، أبوها قالي إنه كلم حد اسمه (الشيخ ياسين) هييجي قريب يعالجها، واتفاجئنا إن البنت بتتكلم معانا وبتقول إنها عارفة إن الشيخ ياسين جاي البيت، ولو جه هتمـ,ـوته وتولـ,ـع في البيت كله، وقتها بس اتأكدنا بنسبة مليون في المية إن البنت مش طبيعية إطلاقًا وفيها حاجة غلط..
وبقيت بقعد أبكي بالساعات وأنا مش عارفة أعمل إيه ولا أحل الموضوع ازاي، لحد ما بعت لواحد روحاني على الفيس بوك كنت بتابعه من وقت للتاني، وبدأت اتفاجئ بحاجات غريبة أوي، قالي على اسم بنتي، واسم أبوها وعندها كام سنة، وقالي إن البنت مرصودة ومحتاجة تتعالج وإن العلاج سهل لكن محتاج فلوس ووقت..
وقال إنه محتاج خامات نادرة وهو هيتكفل بشرائها لو دفعنا الفلوس واللي كانت مبلغ وقدره، كلمت جوزي ووريته الشات، هو كمان استغرب أوي إنه عرف كل ده، جوزي كلمه ولقاه بيقول كل حاجة بتحصل في بيتنا تقريبًا، وحسينا إن ده ممكن يعالج البنت فعلًا، والدليل إن البنت معرفتش إنه هييجي البيت.. قالنا إنه هيجي في أوقات مش معلومة عشان الرصد ميأذيش البنت، والغريب إن من أول جلسة البنت استريحت وبقت كويسة ونوعًا ما بقينا بنحس بتحسن كبير في حالتها..
وأكد علينا الروحاني ده إننا نسمع كلامه في أي حاجة لأن لو العلاج أتوقف في نصه أو جلسة متعملتش البنت هترجع أسوأ من الأول بمراحل، وفضلنا ماشيين على الجلسات.. كنت بستقبل الراجل لأن أغلب المرات جوزي مكانش بيكون موجود وكنت طبعًا بجيب أختي في اليوم ده، والراجل كان محترم جدًا بيقرأ عليها ويتكلم شوية ويمشي وكل ده في صالة البيت مش أكتر ولا أقل..
وفضلت الأمور مستقرة وحسينا أخيرًا إننا قادرين نعيش، لحد ما بنتي بدأت أحوالها تتغير، وجت تحكيلي وقالتلي إن فيه حاجة بتأذيها بس المرة دي بجد، وإنها بقت بتشوف كلب شكله وحش أوي في البيت، وقتها حسيت بخوف كبير أوي.. كلمت الروحاني وحكيتله واللي مكانش روحاني ولا أي حاجة، وقالي إن ممكن تكون البنت اتأذت بجد، وإننا لازم نعالجها بسرعة قبل ما تحكي أو تقول أي حاجة وتفـ,ـضحنا، وبقيت حاطة إيدي على قلبي ليلتها وخايفة الموضوع يتكشف..
وبدأت افتكر لما اتعرفت على (حسن) على السوشيال ميديا بسبب مشاكل بيني وبين جوزي، كان استشاري علاقات وكان بيسمع مني وينصحني، وواحدة واحدة اتعلقنا ببعض وقامت بينا علاقة عاطفية، وكنت بحلم باليوم اللي هيجي فيه ونتقابل مع بعض، وكنت دايمًا بشكيله من بخل جوزي المبالغ فيه.. وقالي وقتها على خطة جهنمية، طالما بنتي بتعشـ,ـق المسرح والتمثيل ممكن نستخدمها عشان أخد فلوس كتير من جوزي ويكون متاح يجي وقت ماهو عايز، جبت بنتي وجبتلها هدايا وألعاب مقابل إنها تمثل إنها ملبوسة من الجـ,ـن، وكانت بتعمل كل اللي بقوله بالحرف وكل مرة بوعد إني أجيب هدية جديدة..
جوزي صدق الموضوع، وطبعًا أنا اللي قولتلها موضوع الشيخ ياسين وكل حاجة تعملها، وأنا اللي خليت جوزي يكلم حسن عشان الموضوع يبقا محبوك، وخدنا من جوزي ١٠٠ ألف جنيه وبقا حسن بيجي بس أوقات غياب جوزي وطبعًا أختي مكانتش بتيجي أصلًا، وكنت بختلي بيه براحتنا، عشت أحلى أيام في حياتي.. إنما إن البنت دلوقتي تبقا ممسوسة بجد دي حاجة ترعب، حسن قالي إنه هيجيب واحد يعرفه هيعالج البنت في جلستين لكنه محتاج ٥٠ ألف، هيدفع هو النص وأنا النص، وفعلا جاب الشخص ده بعِلم جوزي طبعًا وقال إنه هيساعد معاه وفضلوا يقرأوا على البنت اللي كانت بتصرخ بهيستريا..
وأول ما انتهوا ومشيوا البنت جابت موبايلي الجديد اللي مخبياه، وقالت لأبوها إنها مش ممسـ,ـوسة أصلًا وإن أنا اللي قولتلها تعمل كل ده عشان أقابل حسن ونسـ,ـرقه وورته المكالمات والشات.. جوزي يومها كان مذهول، مش مصدق، ضـ,ـربني علقة مـ ـوت وخلى د مي يسيل من كل مكان ورماني لأهلي زي الكلبة، كلمت حسن وأنا منهارة لقيته عاملي بلوك من كل حتة، واتضح إنه عمل نفس الحيلة فيا..
وعد بنتي بهدية لو مثلت إنها ممسـ,ـوسة بجد قدامي، وقالها بعد الجلسة أحكي لبابا وهتلاقي الهدية ع سريرك وقالها تديله التليفون، عشان كان عايز يتخلص مني لأنه زهق مني وحس إن الموضوع مفيش فيه فلوس أكتر، فخد مني آخر ٢٥ ألف معايا وفضحني وهرب.. جوزي طلقني وخد بنتي مني للأبد، وفضحـ,ـني قدام أهلي وقال إني خاينة وحرامية وفيا كل العِبر، وهو مكذبش وأنا أستحق كل ده..
ستات كتير أول ما تحصل مشاكل بينهم وبين أزواجهم يجروا يفضفضوا مع أي حد على النت، وتحديدًا الفئات بتوع حل المشاكل واللي أغلبهم نصابين أو بيعملوا كدا للتسلية مع الستات مش أكتر، وتقع زي الساذجة وتفضح نفسها وترمي نفسها في فتنة كبير.. وفي الأخر تتعلق بواحد نصاب فاهم كويس يكلمها ازاي ويقولها إيه لحد ما يستفيد منها إما بالفلوس أو بالفاحـ ـشة، وهي بتصدق، ومبتفوقش غير وقت المـ,ـصيبة، عشان كدا ربنا حذر من الخضوع بالقول لأنها فتنة عظيمة وإن الست لو عندها مشكلة تحكي لحد أمين ومن العيلة وقادر يحل المشكلة..
[فَلَا تَخْضَعْنَ بِالْقَوْلِ فَيَطْمَعَ الَّذِي فِي قَلْبِهِ مَرَضٌ] سورة الأحزاب بقلم/ أحمد محمود شرقاوي
