كنت رايحة الكلية من شوية وراكبة عربية الجامعة وفوجئت بواحدة ست قعدت جمبي وفي إيديها قطة شكلها قمة في الجمال، لدرجة إنها خ.طفت عيني من أول ما شوفتها، وده ببساطة لأني بعشق حاجة اسمها قطط، لقيت الست بتبسم وبدون مقدمات بتتكلم معايا وبتقول: ـ تعرفي إن القطة دي رزقها واسع أوي عليها وعلى اللي بيكفلها.. ابتسمتلها من باب المجاملة وقلت: ـ رزقها واسع ازاي؟!
ـ يعني كان جوزي هيتحبس من شهر واحد بسبب كمبيالات ووصولات أمانة، ولقينا القطة دي قدام البيت، جوزي كان معترض إني أربيها بس أنا أصريت، ومسافة ما دخلت البيت لقينا تليفون مُبشر بيقول إن اللي هيحبس جوزي ما.ت، ومش بس كدا، ده أولاده صدقة عنه سامحوا أي حد كان أبوهم له عنده فلوس..
كملت كلامها وقالتلي إنهم محطوش في بالهم إن ممكن ده يكون بسبب القطة، بس تاني يوم تعبت شوية وراحت كشفت لقت نفسها حامل بعد سنين من عدم الخلفة، وشوية وجوزها اترقى في الشغل، والمشاكل اللي بينهم راحت، وأمها كانت مريضة بقالها سنتين وخفت خلال أيام، كانت بتحكيلي معجزات وكأن القطة دي الخاتم السحري..
عشان كدا بصت ناحيتي وقالت إنها عاهدت ربنا تدي القطة لأول حد هتقابله في العربية، عشان تحل مشاكله وتخلي حياته أحسن، وهي حست إني عندي مشاكل كتير أوي وإن القطة هتكون سبب في حلها كلها، معرفش ليه ابتسمت، بل وعنيا دمعت كمان، وده لأن فيه في حياتي مشكلة مش هينة إطلاقًا بقالي سنتين وأنا بعاني منها معاناة كبيرة أوي..
المشكلة إن مرات أبويا عاوزاني أروح أعيش مع خالتي وأسيب البيت، وأبويا شخصيته ضعيفة جدًا جدًا وأوقات كتير بيجي في صفها، ومن كتر المشاكل اللي أنا فيها وكان آخر القول إني هخلص امتحانات السنة دي وهروح على خالتي ومش هيكون ليا عيش في شقة أبويا تاني..
عشان كدا استبشرت خير، يمكن القطة دي فعلًا تكون السبب في إن مشاكلي تتحل، وإني أتغلب على الأفعى اللي اسمها مرات أبويا دي، بس كانت مشكلتي إني رايحة الامتحان ومكنتش عارفة هخلي القطة فين، خدت بوكس صغير من الست حطيت فيه القطة واستأذنت الأمن وأنا في قمة الإحراج إنهم يخلوا القطة معاهم شوية لحد ما أخلص وأخدها منهم.. ضحكوا عليا طبعًا بس معترضوش، وخلصت امتحاني وموقفتش مع أصحابي لحظة واحدة، روحت على أمن البوابة خدت القطة ورجعت على البيت، ومن جوايا كانت عندي ثقة تامة من فكرة إن مرات أبويا هتعمل معايا مشكلة كبيرة أوي عشان القطة..
وده ببساطة لأنها رمت ٦ قطط في الشارع بسبب خناقاتها معايا، ولا بتطيق القطط ولا عاوزاهم في البيت من الأساس، بس سلمت الأمر لله ورجعت للبيت، وهناك كان أبويا أجازة من الشغل وقاعد بيتغدى معاها، أول ما أبويا شاف القطة عنيه غربت، وبدأ الغضب يظهر عليه وقبل ما يزعق مراته قالت بصوت عالي: ـ الله، أيه القطة الجميلة دي؟؟
وقفت مذهولة قدامها وأنا مش مصدقة إطلاقًا إنها حبت القطة بالبساطة دي، حتى أبويا نفسه استغرب منها جدًا، وقبل ما يطردها اعترضت وقالت إنها هتخلي القطة هنا ومش هتخرجها من البيت أبدًا، دخلت أوضتي وأنا مش مصدقة عشان يحصل الموقف الأغرب من كل ده، وفوجئت بمرات أبويا جايبة الغدا لحد الأوضة بتاعتي كمان وبتسألني عملت أيه في الامتحان، كل الجنون اللي بيحصل ده مكنش له غير سبب واحد بس، إن القطة فعلًا مبروكة، وإنها هتحل كل مشاكلي، بل وسمعت مرات أبويا بتطلب من أبويا إني أفضل معاهم ونحل كل المشاكل اللي بينا..
مسافة ما سمعت ده مكنتش مصدقة، حبيت القطة أكتر من أي حاجة في الدنيا، حبيتها لدرجة التقديس، بقيت بهتم بيها أكتر ما بهتم بنفسي، بتنام معايا، بتاكل وتشرب معايا، ورغم حب مرات أبويا للقطة بس مكنتش بتلمسها ولا بتقرب منها إطلاقًا، لحد ما خلصت الامتحانات، وقعدت في الاجازة مع صاحبتي في مرة اللي جت تزورني، الغريب إن صاحبتي أول ما شافت القطة وشها اتخ.طف وخافت بطريقة غريبة..
حكيتلها حكاية القطة والست وكل حاجة لقتها غضبت غضب شديد، قالتلي إن ده اسمه تخلف، مفيش حاجة اسمها قطة بتحل المشاكل وترفع الهموم، كل دي أمور خزعبلية ولازم يبقا اليقين بالله وبس، وإن لو عشت في الجنون ده كتير هتأذي.. الغريب إن صاحبتي دي كان أبوها شيخ ومُعالج، وقالتلي إن القطة نفسها وكأن فيها حاجة، ولازم أتوب لله من اللي بعمله ده وأبقا على يقين إن الحل في إيده هو، دي أول حاجة، وتاني حاجة أمشي القطة دي من هنا، وفضلت طول الليل بفكر، قلقانة، كلامها كان مُخيف وغريب جدًا، لحد ما فتحت المصحف واتصدمت لما شوفت الآية دي..
[وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ] سورة الأنعام وعرفت إن الضر مش هيترفع غير بأمر الله وبس، عشان كدا صليت ركعتين توبة لله، وقررت أمشي القطة خالص عشان متفتنش بيها أبدًا، وفعلًا حطيتها في جنينة قريبة وحطيت جمبها أكل ورجعت الشقة، مرات أبويا لما عرفت إني مشيت القطة كانت هتتجنن وعملت معايا مشكلة كبيرة، لدرجة إني ندمت أشد الندم إني مشيت القطة، وحسيت إني المفترض مكنتش أصدق صاحبتي..
ونمت ليلتها متنكدة ومخنوقة ومش طايقة نفسي، وعلى بالليل لقيت باب الأوضة بيتفتح، كان الجو ضلمة ومش شايفة حاجة، حسيت إن فيه حد بيتسحب وبيقرب مني، وبعدها سمعت صرخة، صرخة رهيبة، فتحت النور وأنا مفزوعة لقيت مرات أبويا شايلة القطة وكانت جمب سريري والقطة ع.ضتها في رقبتها، كانت ع.ضة عادية خالص، معرفش ليه صرخت كدا، ومعرفش جابت القطة ازاي وأمتا..
وقدام عنيا شوفت مرات أبويا بتمسك خشبة ضخمة وبتنزل بيها على القطة بتمو.تها، فضلت مصدومة وقت طويل أوي، مش فاهمة هي ليه عملت كدا، هتجنن، حتى لما أبويا راح يدفنها مكنتش فاهمة، لحد تاني يوم الصبح بس، أبويا صحاني بسرعة وروحت أشوف فيه أيه.. لقيت مراته نايمة في السرير ورقبتها زرقة زرقان مُخيف وجلدها مترهل بشكل بشع، جبنا دكتور يشوفها قال إن دمها كله مسموم ومحتاجة تعمل تغيير دم بالكامل، خدناها نجري على المستشفى بس كانت بتقول أنا همو.ت، وعشان تتحرر من الذنب اللي جواها حكتلي كل حاجة..
قالتلي إنها كانت عاوزة تخلص مني بأي طريقة ومش عارفة، لحد ما قابلت واحدة عرافة وحكتلها حكايتها، قالتلها أنا هديكي قط ولازم تخليه يعيش معاها، القط بيع.ض ع.ضة كل شهر تقريبًا، لازم يبقا جمبها أطول فترة ممكنة، ومسافة ما هيع.ضها هتتسمم وتمو.ت، ودفعت مبلغ كبير وخدت القط، وأدتهوني عن طريق واحدة معرفة في العربية..
وعملوا تمثلية إنه بيحل المشاكل والكلام ده كله عشان أحبه واتعلق بيه، وخدته للبيت وهي أوهمتني إنها بقت بتحبني والمشاكل بتتحل، وكان القط خلاص قرب يع.ضني لولا إن صاحبتي فوقتني، وقالتلي ده حرام واسمه تواكل، والمفترض نتوكل على الله، عشان كدا طردته، وهي ومن جنونها نزلت تدور عليه وجابته، ويشاء ربك وهي بتدخله أوضتي يع.ضها هي وتتسمم عشان أشوفها بالشكل البشع ده.. حكت الحكاية وبعد تلت أيام ما.تت، ما.تت بسبب أفعالها، وأنا نجيت بفضل آية قرآنية آمنت بيها بحق آية بتقول:
[وَإِن يَمْسَسْكَ اللَّهُ بِضُرٍّ فَلَا كَاشِفَ لَهُ إِلَّا هُوَ وَإِن يَمْسَسْكَ بِخَيْرٍ فَهُوَ عَلَىٰ كُلِّ شَيْءٍ قَدِيرٌ] سورة الأنعام بقلم/ أحمد محمود شرقاوي
