بنتي الوحيدة بقالها فترة مريضة مرض غريب وغير مفهوم، بدأ الموضوع لما شعرها كان بيتساقط بطريقة مُخيفة، وبعد كدا بدأت تظهر بقع لونها أزرق في كل مكان في جسمها، بعد كدا جلدها بقا بيكرمش وكأنها بتعجز وبتنكمش، وزنها في الفترة دي وصل لـ ٤٠ كيلو، وبقت ملازمة الفراش ومبتتحركش، ورغم إني ورثت من جوزي فلوس كتير أوي إلا إني عجزت إني أعالج بنتي، دفعت ثروة كبيرة على مدار سنة كاملة وكانت حالتها بتسوء يوم بعد يوم، لحد ما عرفت إني هفقد بنتي الوحيدة لا محالة..
كان لازم أمنع ده بأي شكل من الأشكال، عشان كدا قررت ألجأ للإنسان اللي ساعدني من ١٨ سنة كاملين، الإنسان اللي قدر يحل أكبر مشكلة في حياتي، الشيخ كارم، وفعلًا تاني يوم سبت بنتي في سر,,ـــــيرها بتتألم وروحت للشيخ في المكان اللي فاكراه من سنين طويلة، وهناك شوفت نفس المشهد، الستات المتجمعين في صالة البيت القديم، وملامح الخوف ظاهرة على وشوشهم، وبسبب مظهري الراقي شوية كنت ملفتة للنظر والكل كان مركز معايا.. في الوقت ده اتكلمت مع واحدة جنبي وسألتها:
ـ هو الشيخ كارم بيتأخر ولا بيجي على طول؟؟ لقتها بتبصلي باستغراب شديد وقالت: ـ الشيخ كارم مات من زمان أنتي مش متابعة ولا إيه؟؟ جسمي كله اتنفض وقولتلها: ـ أمال الناس دي هنا ليه؟! ردت عليا وقالت: ـ عشان اللي مسكت بعده الشغل هي بنته الشيخة كريمة، وأشطر منه بكتير وبتخلص أي موضوع مهما كان مُعقد..
حاولت اتفائل وفي اللحظة دي خرجت علينا كريمة، عرفتها من هيئتها، واحدة لابسة عباية سودة، وشها كله حِنة وكُحل أسود مشوفتش زيه في حياتي، بصت في وشوشنا كلنا وجت عندي وتأملتني كتير بسبب مظهري والدهب اللي لبساه، ولقتها شاورتلي عشان أدخل، وفعلًا دخلت الأوضة وراها وأنا حاسة بخوف وقلق شديد جدًا، وبعدها طلبت مني أتكلم.. حكتلها كل حاجة وقولتلها إن ليا بنت مرضت مرض غريب جدًا ويوم بعد يوم بتتعب وأنا مش قادرة أعالجها، فضلت باصة في عنيا دقيقة كاملة في صمت وابتسمت ابتسامة خبيثة مشوفتش زيها في حياتي وبعدها قالت:
ـ هزورك بكرة وإن شاء الله هنعالجها بكل سهولة.. وفعلًا تاني يوم جت زارتني في البيت، بنفس هيئتها المُخيفة، وشها كله كُحل وملونة وشها بألوان غريبة، وسألت على بنتي وطلبت إنها تفضل معاها لوحدها، وطلعت بره الأوضة وأنا حاسة بخوف غير طبيعي، وبعد ربع ساعة خرجت ومعاها كيس أسود وقالتلي إنها خدت هدوم من دولابها عشان تكشف عليها من خلال الهدوم دي، وطمنتني إن خلال تلت أيام بس البنت هتخف..
بصتلها بتعجب شديد، البنت زي الهيكل العظمي، وشكلها ولا كأنها عندها ١٠٠ سنة، هتخف في تلت أيام بس، ومعلقتش عليها وفعلًا مشيت، وفضلت بنتي يومين كاملين تبكي وتستغيث من الألم كالعادة، وفي اليوم التالت طلبت مني كريمة إني أسيب الشقة ليلة كاملة عشان المعالجين والحكماء هيزوروا بنتي ولو فضلت مكاني هتأذي أذى شديد، ومكنش قدامي غير إني أسمع كلامها وبس، وفعلًا روحت أبات عند واحدة صاحبتي وسبت الشقة كلها..
ورجعت تاني يوم الصبح، وأول ما فتحت باب الشقة شهقت من المفاجأة، بنتي واقفة قدامي، وزنها رجع وشكلها طبيعي تمامًا، وكأن المرض مقربش منها حتى، فضلت واقفة مصدومة لحد ما جريت عليا وحــ,,ـــــضنتني وقالتلي إنها خفت خلاص.. أنا ومن الفرحة نسيت كل حاجة، المهم إنها بقت كويسة، حاولت أتواصل مع كريمة عشان أشكرها بس كان تليفونها مقفول، مش مهم أي حاجة، المهم إن بنتي بقت كويسة، وفعلًا قضيت مع بنتي يوم كامل وأنا طايرة من الفرحة، رغم إنها كانت مبتسمة ومبتتكلمش غير نادرًا وبصوت هادي خالص..
وبعد يومين تقريبًا صحيت في نص الليل على صوت أنفاس غريبة قدام السر,,ـــــير بتاعي، ولما فوقت بدأت ألمح خيال غريب في الأوضة معايا، تمالكت نفسي بالعافية وحاولت أفتح النور بس في اللحظة دي لقيت بنتي دخلت الأوضة وقالت: ـ متفتحيش النور أنا خلاص مشتها ارجعي نامي تاني.. كانت بتتكلم بقسوة غريبة لدرجة إني خفت منها، وعدت الليلة طبيعية، ومن تاني يوم بدأت بنتي تطلب طلبات مبالغ فيها، عايزة عربية، وعايزة يتعملها حساب في البنك باسمها، وعايزة تعرف ورثت من جوزي كام..
استغربت من طلباتها بس مكنتش عايزة أزعلها وتحديدًا وهي قايمة من مرضها، فوعدتها إني هعملها اللي هي عاوزاه، تاني يوم لمحتها عند دولابي وبتاخد مبلغ كبير أوي، ولما واجهتها بصتلي بكل شر وقالتلي إن دي فلوس أبوها وإني متدخلش في الموضوع ده، تمالكت أعصابي عنها وعديت الموضوع للمرة التانية.. وفضلت بنتي تتغير يوم بعد يوم وطمعها يزيد، مع استمرار الكوابيس الليلية اللي كانت بتدمرني مع الوقت ومكنتش بعرف أدوق النوم، وبدأت أعصابي تنهار بعد أسبوع، مكنتش بعرف أنام من استمرار الكوابيس، وأفعال بنتي بقت لا تُطاق..
لحد ما في ليلة ولما لقتها مصرة تعرف أبوها ساب ورث كام اتخانقت معاها وضــ,,ـــــربتها، بس المُرعب إنها اتحولت وقتها، ومسكت راسي بقوة غريبة وضــ,,ـــــربتها في الحيطة ولقيت الدم بينزل منها، وقبل ما استوعب اللي حصل كسرت على جسمي الكرسي وضــ,,ـــــربتني بقسوة وكأنها عشر رجالة في بعض.. سابتني مرمية في الأرض ببكي وجسمي كله وارم وأزرق وخرجت من البيت، وفضلت مرمية في الأرض ببكي من القهر والوجع لحد ما حسيت بحركة قدامي، بصيت بسرعة وشوفت مشهد جمد الدم في عروقي..
شوفت بنتي، بس مش بنتي السليمة، لا بنتي المريضة، اللي كانت زي الهيكل العظمي، كانت بتبص ناحيتي وواقفة، جسمي كله اتشل وحسيت إن قلبي هيقف، لقتها بتشاور على باب الشقة، ولسبب مجهول كنت زي اللي فقدت إرادتها.. اتحركت معاها وفتحت الباب، لقتها دخلت الأسانسير ولقيت نفسي بدخل وراها، واتحرك الأسانسير لوحده لحد ما وصل للدور اللي تحت الأرض، المخزن بتاع العمارة، ولقتها بتمشي وأنا بمشي وراها لحد ما شاورتلي على برميل صغير في آخر المخزن..
روحت ناحيته لقيته مصبوب بالأسمنت، ولقيت البنت اختفت، دورت في المخزن ولقيت أداة حادة وبدأت أكسر في الأسمنت، فضلت ساعتين أكسر فيه لحد ما وصلت لقعر البرميل، وصرخت بأعلى صوت لما لقيت جــ,,ـــــثه.. قبل ما اتحرك لقيت بنتي قدامي، بس بنتي السليمة، لقيتها بتبتسم وبتقول: ـ كنت متأكدة إنها هتقولك، ما أنا ماليش سلطة كاملة عليهم، بس حلو إنك جيتي هنا عشان أتخلص منك أنتي كمان، ولمحت في إيديها سكــ,,ـــــينة.. واتأكدت إني خلاص همــ,,ـــــوت، لولا إن البواب ولسبب ما حس بيا ونزل المخزن، وسمعته بينادي وبيقول:
ـ مين هناك؟! وصرخت وأنا بستغيث بيه، وفعلًا جري ناحية بنتي وقدر يمسكها رغم إنها عورته وكانت هت.ه، وأنا خرجت من المخزن أصرخ واتجمع أكتر من بواب ونزلوا مسكوها، وجت الشرطة، والدنيا كلها اتقلبت، وغصب عني كان لازم افتكر اللي حصل من ١٦ سنة كاملين.. لما اتجوزت واحد غني ومكنتش بخلف، وروحت للدجال كارم اللي ساعدني أحمل فعلًا وأخلف توأم، واشترط عليا ياخد بنت وأنا أخد بنت بما إنه ساعدني، وفعلًا خد بنتي سعاد وأداني ياسمين، ولما كلمته بعدها قالي إن سعاد ماتت، مكنتش أعرف إنه هيسميها كريمة وهتكون مساعدته بعد كدا..
ولما بنتي مرضت مرض شديد وده بسبب طريقة خلفتها واللي كانت بالسحر جيت استعين بكارم اللي كان مات، واستعنت ببنتي التانية كريمة وأنا معرفش إنها بنتي، لكن هي عرفت لما زورتها، ماهي دجالة زي كارم، ولما جتلي وشافت العِز ده كله قررت ت. أختها وتاخد مكانها بما إنها اتحرمت من كل ده، وفضلت تنهب من ثروتي بعد ما .ت ياسمين، لكن عفريت ياسمين دلني على مكان الجــ,,ـــــثه، ولولا ستر ربنا كنت همــ,,ـــــوت..
اتعاقبت، اتعاقبت أسوأ عقاب ممكن أم تتعاقبه، بنتها .ت بنتها التانية، ولقيت نفسي خسرانة كل ثروتي بسبب عقود مضيت عليها وأنا نايمة بسبب سحر كريمة، اللي كانت هتتخلص مني وتاخد كل حاجة، اتعلمت للأسف بعد خسارة رهيبة إن فيه غلطات كبيرة بنعملها بتلازمنا العمر كله، والزمن مبيمسحش أثرها، الغلطات دي اسمها الكبائر، وياريت نبتعد عنها بقدر الإمكان واللي منها السحر.. ثبت عن الرسول ﷺ أنه قال (اجْتَنِبُوا السَّبْعَ المُوبِقاتِ، قالوا: يا رَسولَ اللَّهِ وما هُنَّ؟ قالَ: الشِّرْكُ باللَّهِ، والسِّحْرُ، وقَتْلُ النَّفْسِ الَّتي حَرَّمَ اللَّهُ إلَّا بالحَقِّ، وأَكْلُ الرِّبا، وأَكْلُ مالِ اليَتِيمِ، والتَّوَلِّي يَومَ الزَّحْفِ، وقَذْفُ المُحْصَناتِ المُؤْمِناتِ الغافِلاتِ) صحيح البخاري
بقلم/ أحمد محمود شرقاوي
