الساعة ٢ بالليل وأنا نايمة في بيت جدتي حسيت بحركة غريبة جنب السرير، ولما فتحت عيني لقيت قط رمادي وشكله غريب واقف يبص عليا، اتخضيت من شكله في البداية لكن تمالكت أعصابي وقمت من مكاني عشان يتحرك ويمشي، وأول ما خرجت للصالة اتفاجئت إن فيه أكتر من ٢٠ قط في المكان، قطط كتير أوي، وكلهم كانوا بيبصوا عليا بتركيز شديد، واللي لاحظته كمان إن باب الشارع موارب، وواضح جدًا لأي حد إنه مش مقفول..
استغربت أوي إن جدتي نايمة وسايبة الباب مفتوح رغم إنها عايشة لوحدها، حاولت أخرج القطط بكل الطُرق لكن ولا قطة كانت عايزة تتحرك من مكانها، لدرجة إني حسيت إنهم بيضحكوا عليا وبيستهزأوا بطريقتي، ومن كتر التوتر مسكت عصاية المقشة وكنت هض.ربهم لكن في اللحظة دي سمعت جدتي ورايا بتزعق فيا وبتقول: ـ إيه اللي أنتي بتعمليه ده؟!
بصتلها بتوتر وقولتلها إني عايزة أخرج القطط وأقفل الباب، قالتلي أسيبهم براحتهم ومقلقش من فكرة إن باب الشارع مفتوح، لأن مفيش أي حد يقدر يدخل البيت ولا يأذينا، وطلبت مني أدخل أنام في أوضتي، دخلت وأنا خايفة وقفلت عليا الباب، لكن مقدرتش أنام إطلاقًا من التفكير والتوتر، وتاني يوم جهزت شنطتي عشان أمشي رغم إني كان المفترض أقعد مع جدتي أسبوع كامل..
ولما لقتني عايزة أمشي فضلت تهدي فيا وطمنتني خالص وكل اللي طلبته مني إني مفتحش باب أوضتي بعد الساعة ١٢ بالليل ولحد الفجر، وبعد أسبوع هتحكيلي حكاية القطط دي، وبعد نقاش طويل اقتنعت وقعدت معاها أسبوع كامل، نفذت فيه اللي قالته بالحرف الواحد، وفعلًا مكنش بيحصل معايا أي حاجة خالص، لحد ما انتهى الأسبوع وجهزت شنطتي عشان أرجع بيتنا لأن والدي ووالدتي كانوا رجعوا من العُمرة، وطلبت من جدتي تحكيلي حكاية القطط دي..
جدتي قالتلي إن بعد ما جدي مات أكتر من مرة كانت بتحس إن فيه حد بيحاول يدخل البيت بالليل، وكذا مرة تشوف حرامي بيحاول يطلع وينزلها من على السطح بحُكم إنها ست كبيرة وأغلب الناس عارفين إن جدي سايبلها فلوس ودهب كتير في البيت، وفضلت جدتي خايفة وقت طويل أوي لحد ما في ليلة سمعت صوت خربشة على باب البيت، ولما خرجت تشوف فيه إيه وهي خايفة لقتها قطة صغيرة مجروحة في راسها وبتحتضر..
جدتي دخلتها البيت وطهرتلها الجرح وجابتلها أكل وحطتها في الدفا لحد ما اتعافت، وفضلت القطة في البيت شهر كامل لحد ما قدر حرامي يدخل البيت في مرة وجدتي صحيت مرعوبة إنه يعمل فيها حاجة، لكن القطة بهدلته وطلع يجري وهو خايف، القطة كانت وكأنها إنسان بالغ مش قطةصغير.. وبعدها جدتي شافت القطة في المنام بتقولها إنها جنية، وإنها بتردلها المعروف، وطلبت من جدتي تسيب الباب يوميًا مفتوح ومحدش هيقدر يقرب من البيت، وقد كان، كل ليلة جدتي بتسيب الباب مفتوح وبتلاقي ٢٠ قط كأنهم حراس بيفضلوا في الصالة طول الليل وبعدين بيخرجوا بكل هدوء..
سمعت الحكاية ولقيت نفسي بضحك غصب عني، لأن واضح إن جدتي عايشة في عالم من الخيال، ورغم إني كنت وقتها في إعدادي وبنت صغيرة بس مكنتش بصدق في الحاجات دي، لحد ما خرجت وركبت القطر، وقبل ما القطر يتحرك من المحطة لمحت القطط في المحطة بيبصوا عليا، كأنهم بيطمنوا إني ركبت القطر ومشيت..
ومن يومها مش قادرة أنسى الحكاية دي رغم إن عدى عليها ١٥ سنة يا أستاذ أحمد، واترددت كتير أحكيهالك لأني عارفة إن صعب جدًا جدًا حد يصدقها، وياريت أعرف فعلًا هل ده حقيقي ولا إيه، لأني مكنتش مصدقة لحد ما شوفت القطط فعلًا في المحطة، هتابع التعليقات وأشوف آراء الناس معاك وبعدين هستنى رأيك أنت على الخاص إذا سمحت.. قارئتك المخلصة زهرة.. بقلم/ أحمد محمود شرقاوي
