فضلت أيام بشوف نفس الراجل قدام سريري، وكنت بنزل أنام عند حماتي عشان مشوفوش، لأنه كان بيظهر في شقتي بس، لأن القذر دخل شقتي أنا بس.. ومع الجلسة الجديدة قررت، واستعنت بالله وزي ما تيجي تيجي، عملت أكل كتير وحاولت أظهر إني كويسة قدامهم، ماهو لازم ياكل بقا، وبما إنه قال إنه عنده السكر واللحم الضاني بيتعبه فأنا عملت لحم دسم جدًا وبشاميل ورز ومكرونة.. وهو كان بياكل وكل ما يقف كنت بغريه ياكل كمان وكمان، أهلي استغربوا الموقف بس محدش اتكلم، وهو أفتكر إني استسلمت وفضل ياكل وياكل، وخليته يشرب بيبسي كمان..
ولما أداني مشروب أشربه قبل الجلسة رميته ومشربتوش، وطبعًا طلب يدخل معايا لوحدنا عشان الجن يحضر بسرعة، وفعلًا دخلت معاه وكنت مجهزة كرسيين عشان أقفل باب الأوضة خالص.. كان فعلًا تعبان ومش قادر يتكلم من كتر الأكل الدسم، لقيته بيمسك إيدي وبيقول: ـ تعبتيني معاكي.. وقتها بس ابتسمت وقولت: ـ وناوية أتعبك أكتر.. وبكل قوتي وبرجلي ض.ربته تحت الحزام، صرخ وحاول يعلي صوته كأنه بيقرأ عشان محدش يلاحظ برا، ولما الباب خبط قال: ـ مفيش حاجة ده الجن حضر وأنا هربيه
رديت عليه وقولت: ـ هتربيني أنا يا قذر تعالى نشوف مين هيربي مين.. وبكل غضب الكون ض.ربته مرة واتنين وعشرة، ومسكت الأزايز اللي على التسريحة وض.ربته في وشه، كنت بنتقم بكل غضب، حقي وكان لازم اخده.. فين وفين لما قدروا يدخلوا، مسكوني أوي لأن وشه كان بيجيب دم ومش قادر يقف مكانه، وبكل تعب قال أنا خلاص هصرفه، ومثلت إني أغمى عليا وفوقت وإن الجن فعلًا هو اللي كان بيض.ربه.. وقتها بس ابتسمت لما شوفت الدم في وشه وشوفت العجز في عنيه، ومن وقتها بدأت أعيد وأزيد إنه خد فلوس كتير ولازم نبطل الموضوع كله..
حتى شقتي اتحججت إني لازم أسيبها ونجهز شقة تانية عشان الدور عالي، وفضلت عند حماتي مبطلعش الشقة، لحد ما جهزنا شقة جديدة، والخط بتاعي كسرته وحذفت رقمه من تليفون جوزي، كنت عارفة إنه مش هيجي غير لما حد يتصل بيه، وأنا خلاص تعبت.. وللأسف أمي اتوفت بعدها وسيبت شقتي كلها وروحت قعدت فترة في بيتي ورجعت لربنا، استغفرت كتير وحسيت إني فعلًا بتحسن أوي، وبقت حياتي ماشية كويسة، بس اللي مقدرتش أتخطاه هو جوزي اللي انفصلت عنه، للأسف راجل بيمسكني عشان اتض.رب وبيسمح لراجل غريب يقعد معايا لوحدنا ميستحقش يبقا الراجل اللي أعيش معاه..
ورغم كل حاجة أنا راضية وعارفة إن ربنا هيراضيني، وبحمده دايمًا وبطلب منه العفو.. ……………… قصة حقيقية… كلمتين لوجه الله من الكاتب، مفيش شيخ بيطلب يختلي بالحالة لوحده، مفيش شيخ بيطلب مبالغ كبيرة، مفيش شيخ بيض.رب ويحط إيده على المريضة غير على راسها وبيكون من خلال رداء وفي وجود محرم، ويكون كل علاجه بكتاب الله والأذكار وبس، غير كدا يبقا خليك راجل واض.ربه بالجزمة.. بقلم/ أحمد محمود شرقاوي
