من كام يوم جتلي رسالة من اللي وصلت أغلبنا على الواتساب، أنا فلانة من شركة كذا الدولية وبعرض عليكي تشتغلي معانا بدوام جزئي عدد ساعات يوميًا والمقابل من ٢٥٠ لحد ٥٠٠٠ جنيه يوميًا، والشغل عبارة عن إنك تعمل إعجاب وتتفاعل مع مقاطع تيك توك معينة خاصة بالتُجار، ولو حابب نبدأ دلوقتي ونبعتلك ٦٠ جنيه مقابل إنك تتفاعل مع ٦ فيديوهات بس..
طبعًا موضوع مهروس ومعروف إنه نصب إحترافي، بس لما تسمع عن الحاجة شيء، ولما تتعرض لها شيء تاني خالص، عشان كدا مردتش على طول وفضلت أفكر، أنا أصلًا محتاجة ٥٠ جنيه عشان أجدد الباقة بتاعتي، وغالبًا حتى لو نصابين هيبعتوا المبلغ البسيط ده عشان يجيبوا رجلك في البداية.. وفضلت أفكر، بعت لأكتر من واحدة صاحبتي كنوع من أنواع الهزار، واحدة قالتلي اتعاملي عادي لحد ما يطلبوا تحولي فلوس عشان تتضاعف ووقتها أعملي بلوك، إنما طول ما هما بيبعتوا عادي، وواحدة تاني قالتلي حتى لو هيبعتوا الفلوس دي مصدرها حـ,ـرام وإياك تاخديها..
حـ,ـرام ببساطة لأنك بتتفاعل على فيديوهات مش كويسة، وبتعمل عمل مشبوه وغريب ولو هتتكلم عن النية فأنت في نيتك متكملش، يعني شُبهة كبيرة وفلوس مش معروف مصدرها، بس أنا رديت عليها وجالي الرد بأكتر من لينك، أدخل واتفاعل، واتسألت إن كان عندي تيليجرام ولا لا وكمان تيك توك، وبعتلهم لينكات صفحاتي، وكلها دقايق ووصلني ٦٠ جنيه فعلًا على فودافون كاش وانتهت المهمة الأولى..
وجددت الباقة وكنت في قمة فرحتي، وتاني يوم اتفاعلت مع ٢٠ فيديو ووصلني ٢٠٠ جنيه، وفضلت معاهم على مدار أسبوع لحد ما وصلني ٨٠٠ جنيه، وبعدها اتقالي إن هيتم ترقيتي للأعضاء المميزين وعشان أثبت ده والأجر يتضاعف لازم أبعت ٥ آلاف جنيه للوكالة كنوع من أنواع الاستثمار..
وهنا ضحكت، جايين تنصبوا عليا، أنا اللي نصبت عليكم، وروحت عاملة بلوك، تاني يوم لقيت رسايل على تيليجرام برقم مجهول، بعتلي نص صوري اللي كانت على الموبايل واللي كنت فيها بشعري ولبس البيت، واتطلب مني أبعت الخمس آلاف وإلا الصور هتتنشر على النت، حسيت بخـ,ـوف كبير بس برضه بلكت الرقم، وعرفت إنهم ببساطة من خلال اللينكات بتاعة الفيديوهات دخلوا على موبايلي كله، عشان كدا عملتله ضبط مصنع.. بعدها بشوية اتفاجئت إن رقم تاني باعتلي اسكرينات فيك وأنا بتكلم مع حد صوري وبنقول كلام كله قذر، وكان الكلام ملائم مع الصور بطريقة مُخيفة جدًا، ولقيت فويس بصوت مُخيف أوي بيقول:
ـ ابعتي ٥ آلاف جنيه وإلا هنفضحك في كل مكان إحنا عارفين كل اللي تعرفيهم كويس.. وعرفت إني اتورطت، ومتأكدة إني لو بعت الفلوس هيطلبوا تاني وتالت ورابع، وياما قريت قصص عن الابتزاز ده وعارفة هما بيتعاملوا ازاي، عشان كدا بدون تفكير عملت بلوك من تاني لعل وعسى يزهقوا مني، وبعتلهم فلوسهم اللي هما الـ ٨٠٠ جنيه اللي خدتهم على أمل يشوفوا غيري، بس بعد يومين لقيت فويس من رقم غريب، معرفش ليه ألف حاجة جوايا حـ,ـذرتني أفتح الفويس ده، بس غصب عني كان لازم أفتحه..
