كنت عايشة مع خالتي من وأنا طفلة صغيرة بعد وفـ . ـاة أمي وأبويا في حـ . ـادثة، وفضلت معاها لحد ما بقى عندي ٢٥ سنة كاملين، كانت هي الأم والأب وكل حاجة ليا في الدنيا، لدرجة إن أولادها كانوا بيغيروا مني لأنها كانت بتعاملني معاملة خاصة جدًا بعيدًا عنهم..
ياما حاولوا يمشوني ويعملوا فيا مقالب صعبة بس خالتي كانت حاطة شرط قاسـ . ـي أوي، إني يوم ما همشي من الشقة هي هتمشي معايا، وانهاردة بس خالتي مشيت من الشقة، بس مشيت لدار الحق، وكنت عارفة إن بعد مراسم العزاء أول حاجة هتتعمل هي طردي من الشقة وكفاية عليا أوي كدا..
عشان كدا جمعت حاجتي كلها وجمعت الـ . ـمبلغ اللي خالتي ادتهوني من فلوس كانت بتحوشها ليا عشان أقدر استأجر شقة وأعيش فيها لأنها كانت على يقين إني مش هكمل بعد وفاتها، وفعلًا بناتها لما لقوني جمعت حاجتي ضحكوا وأنا مستنتش لحظة واحدة ومشيت من الـ . ـمكان كله..
وربنا أكرمني وخدت شقة كويسة في مكان شعبي أعيش فيها ودفعت إيجار ٣ شهور وبدأت أشوف حياتي هتمشي ازاي بعد ما بقيت لوحدي تمامًا، اشتغلت أكتر من شغلانة بس للأسف كنت بمشي منهم بسرعة، مرة حد يعتدي عليا، مرة أحس بالقلق من صاحب الشغل، مرة اتهان بدون أسباب، وبدأت أشوف الدنيا قاسـ . ـية أوي ومبقتش عارفة هروح فين ولا ممكن أعمل إيه في حياتي..
لحد ما جتلي زيارة قاسـ . ـية أوي من بنات خالتي، وقالولي إنهم عرفوا إني خدت مبلغ من خالتي قبل مـ . ـوتها وإن ده حقهم، وهددوني لو مرجعتش الفلوس أو اللي باقي منها هيأذوني، وواحدة منهم كان جوزها محامي قالي إنه هيعملي محضر ويحبسني..
بكيت قدامهم يمكن يرحموني بس كنت شايفة شياطين قدامي، قلتلهم إني دفعت منهم ٣ شهور إيجار وصرفت منهم، قالولي أجيب الباقي وهيسيبوني في حالي، وفعلًا رجعتلهم الباقي واتفاجئت إني مش معايا أي فلوس أعيش منها، وكمان شهر واحد وهبقا مطالبة بعد كدا بدفع الإيجار، وفضلت أجري وأدور على شغل لحد ما واحدة دلتني على شغل في كوافير بيدفع مبالغ كويسة ومش شرط خبرة..
جريت على هناك في نفس اليوم وقابلت صاحبة الكوافير، ست كبيرة وتحس إنها سرحانة ومش مركزة في كلامها وبتتكلم بصعوبة، أول ما شافتني وافقت بيا واتفقنا على مبلغ كويس أوي، وفعلًا بدأت شغل معاها ومع بنتين كمان معاها، عرفت إن الشقة اللي فوق الكوافير بتاعة الست وعايشة فيها، وعرفت إن الست مريضة نفسيًا ومش متزنة بس شهادة لله كانت بتتعامل باحترام كامل معانا..
ومن وقت للتاني أثناء الشغل كنت بلاحظ إن الست بتكلم نفسها، بتركز مع الفراغ، وأوقات كتير كانت بتبص بسرعة ناحية مكان ما وكأنها شايفة حاجة بتجري أحنا مش شايفنها، البنات كانوا بيشتغلوا ٥ أيام وأنا طلبت اشتغل ٧ أيام كاملين لأني فعلًا محتاجة الفلوس بسبب الإيجار اللي عليا وكمان كنت بتعالج من تعب مستمر في بطني وبحتاج أدوية باستمرار.. وكنت بحاول فوق الشغل أراعي الست وأهتم بيها وتحديدًا في اليومين اللي كنت ببقا فيهم لوحدي في الكوافير وأوقات كتير كنت بطلب منها تطلع ترتاح في شقتها وأنا أهتم بالكوافير والزباين والفلوس، وكانت بتسمع كلامي فعلًا وتطلع شقتها..
ومع الأيام بدأت تثق فيا وتحكي معايا، وكانت بتقولي إنها محتاجة حد يعملها أكل لأنها مريضة وينضفلها شقتها ويهتم بيها، وبدون تفكير قولتلها إني ممكن أعمل كدا، ولما عرفت ظروفي والإيجار الكبير اللي بدفعه عرضت عليا أعيش في الشقة اللي فوق الكوافير لأنها هتقعد فترة مع أختها ومش عايزة تكون الشقة فاضية وكمان مش هتاخد مني أي إيجار، فضلت أفكر بس مدتنيش فرصة وخلتني فسخت عقد الإيجار وطلعت الشقة نضفتها وسكنت فيها في يوم وليلة..
